O loo silafia lelei e le tamaitai faia’oga o le ‘au a le Manusina ta’ito’afitu, Filoi Eneliko e le’i lava ni taaloga poo ni taamilosaga e taaalo ai lana ‘au a o tapena mo le World Challenger Series i Cape Town i le vaiaso fou aemaise o le aofa’i o teine taaalo e fai mai ai lana filifiliga o loo iai se faatapulaa.
O loo ta’ua i le RNZ lea faamatalaga a le faia’oga na faia i le Samoa Observer a o le’i aga’i ese mai le ‘au mo Aukilani.
Ina ia agavaa mo se avanoa i play offs o le taamilosaga ta’ito’afitu a le lalolagi ia Me, e tatau ona lelei le tulaga o le Manusina i le faai’uga o taamilosaga e tolu ma afai ae ausia lea tulaga ona taalo lea ma ‘au e fā pito i lalo mai le taamilosaga o le ta’ito’afitu a le HSBC o loo faagasolo nei.
O loo iai le ‘au i Aukilani mo le tasi le vaiaso a o le’i faimalaga atu i Cape Town lea o le a faataunuuina ai le ulua’i taaloga ta’ito’afitu i le faai’uga o le vaiaso fou.
O loo faatulaga e taaalo le Manusina ma le ‘au a Kenya ma Poland i Pool Games ma e ui i lu’itau e pei ona saunoa iai le faia’oga ae na ia faailoa foi e tele le faatuatuaga o iai i ana teine taaalo.
Puna o Faamatalaga: https://www.rnz.co.nz/international/pacific-news/542251/challenges-strengthen-manusina-sevens-side-ahead-of-cape-town-tourney
