O le amataga o le masina o Oketopa na aloaia ai le sainigalima o le maliega i auaunaga tau vaalele poo Air Service Agreement i le va o le Malo Samoa ma le Setete o United Arab Emirates (U.A.E.) o le a mafai ona maua ai faigamalaga vaalele faavaomalo i le va o atunuu e lua.
O lea sainigalima na faataunuuina i totonu o Quebec City, Montreal, Canada ma o le afioga i le Minisita o Fela’uaiga ma Galuega Tetele a le Malo ia Olo Fiti Afoa Vaai sa fai ma sui o Samoa e sainia lea maliega, ae o le Faatonu o le General Civil Aviation Authority ia Saif Mohammed Al Suwaidi sa fai ma sui o le U.A.E.
O lenei maliega faalemalo e tāua tele aua o le a faaleleia ai le sootaga ma auaunaga o lea atunuu i tulaga tau vaalele ma tele ai avanoa mo malaga i le va o atunuu e lua.
Faailoa e le afioga i le Minisita o lenei maliega ua sainia o le a mafai ai ona faaaogaina e le Samoa Airways i le Code Share Agreement ma nisi lava vaalele e 6 a le U.A.E.
Na maua le avanoa mo lea sainigalima i totonu o Kanata ina ua auai atu le afioga i le Minisita ma lana auusufono mo le fonotaga a le 41st Session International Civil Aviation Organization poo mataupu tau auaunaga i luga o le ea.
