O alo o Samoa, le tamaitai o Sylvia Brunt mai le Black Ferns ma le alii o Wallace Sititi o le All Blacks, o i la’ua ia ua faaigoaina o tagata taaalo iloga (Breakthrough Players) o le 2024 i le Pasifika Rugby Hall of Fame.

Ua mauaina e le tamaitai o Sylvia le faailoga o le Monique Hirovanaa Breakthrough Women’s Player of the year ma o le a tauaaoina lea faailoga i se sauniga e faia i Aukilani i le aso 10 o le masina nei e pei ona ta’ua i lipoti a le RNZ.

O Wallace ua ia mauaina le Waisale Serevi Breakthrough Men’s Player of the Year mo le itupa o alii.

E tulaga ese le taumafai a ia alo o le atunuu, o Sylvia na mua’i taalo mo le Blues i le Super Rugby i le 2021 faato’ā 17 lea o ona tausaga ma taalo ai mo le ulua’i taimi mo le Black Ferns i le 18 o ona tausaga.

Sa kapeteni i le ‘au Mt Albert Grammar 1st XV ma o se sui foi o le Ponsonby Senior Women’s team na malo i le Talita, Coleman Shield 2020.

O Wallace sa taalo i le 1st XV a De La Salle, faasolo atu ai i North Harbour ma le kalapu a le Chiefs se’ia oo ina maua lona avanoa i le All Blacks i le tausaga talu ai ma e tulaga ese lona taumafai e pei ona molimauina e le to’atele.

Puna o Faamatalaga: https://www.rnz.co.nz/international/pacific-news/557014/two-young-stars-recognised-as-pasifika-breakthrough-players-of-2024