E tulaga ese foi se lipoti ua lipotia mai Nigeria lea e faapea e to’a 29 tamaiti e ono feagai ma le faasalaga oti ona o lo latou auai ai i se solotetee sa faia faasaga i le atunuu ma le tau o le soifuaga.
O le to’afā o i latou ia sa matapogia i le faamasinoga ona o le lēlavavā ma e lei faia ni a latou tali i moliaga.
E 78 le aofa’i o le ‘autetee ua faia nei iai moliaga, fai mai ua solia le tulafono, e aofia ai le faalata, faaleagaina o meatotino, faasoesa i le lautele ae o i latou ua molia e mai le 14-17 tausaga le matutua.
O le lē fiafia o tagata i le tau o le soifuaga na afua ai ia tetee e amata mai i le masina o Aokuso lea na tafana ai ma maliliu tagata e to’a 20 ma le faitau selau na pu’e e leoleo.
O le faasalaga oti na amata i le vaitau o le 1970 i Nigeria ae e lei iai lava nisi ua maliliu ai talu mai le 2016 peitai la o lea ua faaāta mai i latou e to’a 29 o tamaiti e i’u ina aafia ai i lea tulafono.
Ua ta’ua foi i nisi lipoti a o feagai ai le to’atele ma lu’itau i le taugatā o le soifuaga ae ua faailoa o le ‘aufaitulafono lava ma faipule o le atunuu e aupito selesele i faamanuiaga tau tupe aemaise i totogi o galuega aemaise foi le to’alua o le peresetene fai mai e iai ana taavale SUVs e faaaogā ma isi mea taugatā e faia ae totogi uma i tupe a le ‘autotogi lafoga.
I le mataupu i tamaiti e pei ona ta’ua ua faailoa e se tasi o loia o lalo o le tulafono o aiātatau a tamaiti e lē faatagaina ai se tamaititi e ave i se faamasinoga o soligatulafono ma faasala i se faasalaga oti.
Puna o Faamatalaga: https://edition.cnn.com/2024/11/02/africa/children-face-death-penalty-cost-of-living-nigeria-intl-latam/index.html
