O loo faagasolo polokalame o le 16 aso e taofia ai sauaga i fanau ma tina ma tamaitai aemaise sauaga i totonu o aiga, peitai ua le o se tala lelei le faasolo o lea polokalame i totonu o nuu ma afioaga i le taimi nei, ae faailoa e leoleo le fano o le ola o se teineititi 13 tausaga le matua na aafia se vaega o lona ulu ina ua togi e lona tina se tasi o lana fanau, ae alu atu le maa lē maua se tasi o le fanau na faatutu i ai lea gaioiga, ae lavea ai le ulu o le teineititi.
O le tuanai o ni aso o taofia i le falemai mo togafitiga ae maliu. O le tasi lea o vaega o polokalame o loo taumafai e faamuta ai sauaga e aafia ai le fanau, o le taofi o le ita aemaise tagata e vave tele ona toatamai, liliu loa i se laau, se maa poo se isi lava mea faitino ua faataunuu ai se gaioiga e toe mau manatu ane ma salamo mulimuli, ua masaa le ipu vai.
O le a faalauaitele mai e le Sui Komesina o leoleo lenei mataupu i le feiloaiga masani i lenei vaiaso ma le vasega o tusitala ma le aufaasalalau.
Ae o le tausaga e 2019 na tulai mai ai foi se gaioiga tau sauaga na fano ai le ola o se tamaititi pepe tasi le tausaga le matua, e mafua ina ua tagofia e lona tina le ‘au o le salutu ma ia tuu atu ai ni ta i lona tino.
O loo tuli le faasalaga falepuipui o lea tina i le taimi nei.
