O suesuega a leoleo i le faatama’ia o se fale o se aiga i Faleula i ni vaiaso e lei mamao atu, o lea ua faailoa e le Komesina o leoleo, falepuipui ma le toe fuata’ina ua molia ai i le solitulafono o le susunu fale ni alii se toafitu o lea afioaga.
O le aafia o meatotino a lea aiga i le malaia na faatama’ia ai se fale inisinia ma ni taavale sa iai i le nofoaga i le taimi o le mu.
O loo iai masalosaloga e fesootai lea faalavelave tau mu i se vevesi faalotoifale na aafia ai nisi o le aiga ua aafia i le mu a latou meatotino ma le matai Sa’o o le nuu ma lona faletua, o le sui faipule o le itumalo o Sagaga Tasi.
O le aso 8 o le masina fou o Iulai e valaau ai moliaga o tama tane e toafitu ua molia i le susunu fale.
