O se alii pule a’oga o se kolisi maualuga i lo tatou atunuu ua molia e leoleo i ni solitulafono e fesootai i se gaioiga na ia faia i se tamaitai faiaoga o lea kolisi.

Ua faailoa e le Komesina o leoleo i se lipoti, e lua moliaga o le taumafai e faatino se faiaiga faamalosi ma le moliaga o le faaoolima matagā ua tuuaia ai le pule a’oga ua 50 tausaga o lona matua.

O Tesema o le tausaga na tea nei na lipotia ai i leoleo lea gaioiga ma faia loa iai suesuega.

O le masina fou o Fepuari pe a toe amatalia galuega tau i mataupu o soligatulafono i le faamasinoga maualuga o le a tulai ai le ua molia.

O loo tatala o ia i tua i aiaiga masani o le saini i le ofisa o leoleo ma taofia le Tusifolau i le ofisa o faamasinoga.