O se galuega a leoleo i Tuasivi na alu ai se osofaiga i le nuu o Salelavalu ma maua ai ni laau faasāina o le maruana, peitai o se galuega na osofaia ai ma Malu o le Malo ma faamanu’alia ai ni alii leoleo se toalua i se pulu fana o le laau malosi o le ituaiga o le 12 poo le twelve gauge shot gun.
O se faasalalauga mai le matagaluega o leoleo, falepuipui ma le ola toe fuata’ina o loo ta’ua ai sa tali atu leoleo i se valaau mai Salelavalu na lipoti ai ni vaaiga o ni laau maruana o loo totō i se fanua o se aiga, ae tulai mai ai lea tulaga. O se tasi o tagata o loo masalomia i le umia ma le totōina o laau faasāina sa ia faaaoga le laau malosi na aafia ai ia alii leoleo e toalua. Sa auina atu i le falemai i Tuasivi ma togafiti ai o la manu’aga ma ua toe tetea i tua.
Ua tuuina atu ai le lagolago a le afioaga o Salelavalu i leoleo i le sailia o i latou o loo aafia i le faia o le solitulafono o le umia ma le totōina o le maruana o se laau tau nakoti e le faatagaina ona totō i Samoa. Ua ave le tuualalo a leoleo i le atunuu mo ni faamatalaga e mafai ona maua uma ai i latou e iai o latou sootaga i le faia o lea solitulafono.
I suesuega a leoleo o loo faagasolo pea i le mataupu lenei, o lea ua faailoa e leoleo ata ma suafa o ni alii se toatolu o loo fia sailia, o i latou ia o Apisaloma Setu poo Sula Setu o Salelavalu ma Satapuala, Manuia Lafaele poo Manuia Tanuvasa poo Manu Lafaele o Salelavalu, ma Masina Lega Ta’ulelei poo Ti’ata Masina Lega Ta’ulelei o Salelavalu ma Salailua.
Mo i latou e silafia ia taulelea faafesootai se ofisa o leoleo o lata ane, poo le ofisa autu o leoleo i Tuasivi ma Apia.
