E lata i le 180kg le mamafa o methamphetamine na maua e leoleo i Aukilani, ma fai mai leoleo e talitonu o fualaau faasāina nei e sau uma mai Mexico.
E toatolu alii o lea ua molia ma o ananafi na tutulai ai i luma o le Faamasinoga Faaitumalo i Aukilani, ma o i latou uma foi nei o tagatanuu Mexico, 23, 27 ma le 32 tausaga le matutua.
O le maua ai o fualaau faasāina nei ma saisai mai le toatolu ananafi o le i’uga lea o suesuega ua tolu masina o fai e lē gata i leoleo ae faapea le vaega o tiute.
O le uafu i Tauranga lea na maua ai le container, o isi na maua mai ina ua su’e potu o faletalimalo ma Air BnB i Aukilani i le vaiaso nei faapea ai ma le atopa’u na maua i le malaevaalele i Aukilani i le vaiaso nei lava a o taumafai le isi alii e tuua le atunuu.
O methamphetamine ua maua mai suesuega nei e faatusaina i le $63 miliona lona tau.
Puna o Faamatalaga: ‘Significant’ $63m Mexican crime syndicate meth bust in Auckland (1news.co.nz)
