O le tiute tauave i le vaaia o le puipuigamalu o ulu o Malo o le Taupulega ma a latou usugafono, aemaise o isi tagata o le a auai i lea fono faavaomalo, o le pitolaau tutasi lea o le a gafa ma le Malo o Samoa.
Ua faaalia i pepa o tapenaga o lea fono, o le a iai tagata e vaaia le puipuiga o Ulu o Malo o le a malaga mai, peitai o le taimi e taunuu ai i Samoa e leai so latou malosiaga faaletulafono e faatino ai nisi gaioiga tau puipuiga auā o le pitolaau lea ua taatia mai e tapena iai Samoa, lea ua feagai nei ma le Matagaluega o Leoleo, Falepuipui ma le Toe Fuata’ina.
O lea ua faailoa e le matagaluega i ana auala o fesoota’iga, le faia o ni a’oa’oga mo se tasi o auaunaga tuma’oti o loo ofoina le auaunaga tau puipuiga le KL Security, o le a faaaogā i le taimi o lea taligamalo.
Ua faailoa i pepa o tapenaga o nofoaga uma e faia ai fonotaga ma faletalimalo e faamautu ai faauluuluga o malo ma usugafono, e tatau ona malu le tulaga i le puipuiga.
O lea foi ua faailoa ai le tatau i sui uma o malo ma usugafono o le a auai ona faaaogā le auaunaga tau i le puipuiga o le a saunia i nofoaga o fonotaga e su’e ai ato ma isi vaega e tatau ona saili, ina ia mautinoa ia saogalemu nofoaga uma o le a faaaogā.
O ni auupega e pei o laaumalosi ma ututau e ono aumai e nisi o usugafono ona o le itu i le puipuiga, ua ave iai le fautuaga malosi i le tatau lea ona faailoa ia auupega pe a taunuu i Samoa ma ia tuuina atu i leoleo e taofia ai, seia mae’a le fono ma toe taliu i o latou atunuu ona toe foi lea ma ave.
