Ua faailoa e le Ofisa Sili Lagolago o le Matāgaluega o Tina ma Tamaitai Atina’e o Afio’aga ma Agafesoota’i o loo faauluulu i galuega o le poloketi tasi le miliona a le malo, ua faailoa atu e leoleo, ua iai nisi ua masalomia i le gaioiga na ulufale faamalosi ai i le ofisa o le poloketi ma aveese le masini komepiuta laptop ma lona drive.
O tagata o loo masalomia o ni tamaiti se to’alua ae lē o ni tagata faigaluega o lea matāgaluega o loo iai le vaaia o le faagaioia o le poloketi miliona.
Faaalia e le Ofisa Sili le tofa Unasa Viane o le masini laptop ua aveesea o se mea faigaluega a se tagata ofisa sinia o le poloketi o le principal officer.
O faamatalaga o le poloketi miliona o loo iai i le laptop ua gaoia na faaalia e Unasa o loo maua uma i isi faamaumauga a le ofisa.
O le taimi nei o loo faatali pea le Matāgaluega o Tina ma Tamaitai Atina’e o Afio’aga ma Agafesoota’i i se faamatalaga atu a leoleo poo fea ua aga’i iai a latou su’esu’ega.
