O auala o fesootaiga faaonapo nei a le ofisa o le komisi o faigapalota ua faasalalau ai nei le lisi umi o suafa o tagata palota o le itumalo o Vaimauga 3, i latou e lei palota i le palota laititi a lea itumalo na toe saili ai so latou sui usufono i le Palemene.
O aiaiga o le tulafono o faigapalota ua faamalosia ai le faia o lesitala ma le faia o le palota, ma e faasala tupe tagata e lē usitaia lea aiaiga o le tulafono.
I luga o le fesootaiga o loo faasalalau ai suafa o tagata palota o lea itumalo e lei palota, o loo faaalia ai e nisi latou te silafia nisi o suafa, e faapea ua maliliu isi ae o nisi ua malaga ma faamautu i atunuu i fafo.
O le tasi lea o fautuaga a le komisi suesue na toe iloiloina le tulafono o faigapalota i le mae’a o le palota tele o le 2021, ia soloia lea aiaiga ae toe foi i le tulaga sa iai muamua.
O aiaiga tuai o lea tulafono sa faamalosia ai le lesitala o le tagata ua tatau ona palota, ae e lei faamalosia le faia o le palota.
E selau tala le faasalaga o le tagata e lei lesitala ma le tagata e le palota.
O le mae’a o faigapalota o le 2016 ma tua atu na molia ai i le faamasinoga ma faasala ai nisi o tagata palota e lei usitaia lea aiaiga faaletulafono.
