O le aoauli nei na tuuina aloaia mai ai le lauga faamavae a le afioga ia Tuilaepa Lupesoliai Sailele Malielegaoi o lē sa avea ma Palemia o le Malo Tutoatasi o Samoa mo le 22 tausaga. I lana lauga faamavae na ave ai le faamalo a Tuilaepa i le Malo fou ma le Kapeneta mo le latou tulai mai i le isi lima tausaga.
O le tausaga e 1982 na amata auai ai Tuilaepa i upufai o malo mo Samoa a’o tauavea e nisi o toa manumanu a le atunuu le tofiga palemia i lalo lava o le fu’a a le HRPP lea ua fai i lagi le folauga e pei o le afioga ia Vaai Kolone ma Tofilau Eti Alesana, mulimuli ane avea ma Palemia i le tausaga e 1998 seia oo ina faamavae i le asō Aso 26 o Iulai 2021.
O le taimi muamua lenei ua malōlō mai ai Tuilaepa ma le tofi Palemia ina ua filifilia e le atunuu le uluai tamaitai Palemia mo Samoa le afioga ia Fiame Naomi Mataafa. O se tasi na tupuga mai foi i tala’aga o upufai a Samoa ma o se alo e faasino i le uluai palemia a le atunuu lona tuaā le afioga ia Fiame Mata’afa Faumuina Mulinu’u II.
Taua e Tuilaepa i lana lauga faamavae “o le ā tapuai le HRPP , o le fai le galuega lelei e tuu tuu atu ai tatou tauau e lagolago i le mutaaga e muta mai ai i le agaia o outou faa 500% i taimi uma”, O le a matou tutumau e tautua Samoa e ala i le faamamaluina o le tofi faipule na filifilia ai le faipule e tauto ai i luma o le Atua silisili ese o le a ia faia ma le faamaoni e tū tū mau ai i totonu o le Palemene i taimi uma e fono ai ae le’o le tiai o le palemene ae o fai nisi mea”.
Na ia fautuaina ai foi Matagaluega uma a le malo ina ia lagolago i le faigamalo fou mo le agai i luma o Samoa.
Na molimauina lenei faamavaega e faipule o le HRPP ma le au lagolago a le vaega faaupufai ae le gata i lea o aiga uo ma e masani. Na faaiu lenei faamoemoe i le sa’asa’aga mulimuli a le afioga Tuilaepa Lupesoliai Sailele Malielegaoi i le maota i Petesa i Mulinuu.
