E lē taumate e tetele nisi suiga o le a vaaia i Aukilani i se taimi e lē o toe mamao e aofia ai ma le faamalosia o itula e mafai ai ona faia fefaataua’iga ma le lua tausaga o le a taofia ai le faamatuu atu o laisene mo ‘ava malosi i nisi o nofoaga.
O le Alcohol Regulatory and Licensing Authority pe a faapuupuu o le ARLA ua o latou ioeina nei le faiga faavae lea mai le Pulega a Aukilani ma ua lalata foi ona faataunuuina.
O le faiga faavae fou la lea o le a faamalosia ai le faamamalu o itula o fefaataua’iga aemaise i supamaketi ma bottle shops, lona uiga o le a lē toe mafai ona o latou faatauina ese atu le pia pe a ta le 9 i le po.
O le taimi nei o loo mafai pea ona oo atu i le 11 i le po le faatauina o le ‘ava malosi.
O loo faatalia se isi fonotaga e faamautu ai le aso o le a faamamaluina ai ia suiga ae ua faailoa e le ta’ita’ifono o le komiti lea, Josephine Bartley i le One News o faiga fou ia o le a fesoasoani i le faaitiitia o aafiaga o le ‘ava malosi.
Puna o Faamatalaga: https://www.rnz.co.nz/news/national/524407/auckland-s-new-liquor-policy-approved-after-lengthy-legal-battle
