A’o iai pea le lalolagi i aafiaga o le Koviti19 o se tala fiafia mo Samoa lava ia i le fuafuaga a le Mālō o Niu Sila o le a tatala ai le malaga atu o tagata Samoa e aunoa ma le faanofoesea. Peitai o se avanoa mo na’o i latou ua maea lelei tui puipui e lua o le faama’i ma o loo umia foi tulaga tau tagatanuu e lua Samoa ma Niu Sila.

Ua faailoa e le taitai o le Mālō le tamaitai Palemia Fiame Naomi Mataafa o le a mafai ai foi ona malaga tagata Samoa o loo nofomau i Aotearoa i Niu Sila nei. Mo fanau sikolasipi i Niu Sila o le amataga o le tausaga fou e faatoa iloilo ai le toe mafai ona malaga mo aoaoga e aunoa ma le faanofoesea.

O le Aso Gafua o le vaiaso fou e amata ai le tatala atu e Niu Sila o le malaga mai o i latou o loo agavaa i lalo o lea suiga o femalagaiga lea ua agavaa ai ma gasegase e auina mai mo togafitiga e aunoa ma le faanofoesea. 

Taua e Fiame i lana feiloaiga ma tusitala “Ua iai foi le faamoemoe o tagata Samoa o loo i Fiti e fia faafoi mai i latou se lei uma le tausaga o loo faagasolo nei”.

O se gaioiga e mo le puipuiga o tagatanuu e o gatasi ma le feiloai atu i aiga ua leva ona valavala ao agai atu ai le folauga a le atunuu faapea le lalolagi i le faaiuga o lenei tausaga.