O le taeao nei na faia ai se fonotaga a matai ma tapaau a le afioaga o Salelologa i le motu tele i Salafai e faatatau i le solo a taavale a le vaega faaupufai e Puipuia Aia tatau o tagata le HRPP lea e fuafua e faia i le aso a taeao Aso Tofi 5 o Aukuso 2021.
O lea fonotaga na taua ai e matai o le nuu “o le solo lea e kau sau kaeao, kaofi. E leai se solo e solia Salelologa”.
O le latou mau “ia fai le finagalo o le Atua ma le atunuu e ala i faaiuga ua tulai mai mo le malo”.
Ae o le vaiaso na tea nei na savalia ai foi e nisi o matai o lea lava afioga le vaega faaupufai a le HRPP i le maota i Petesa Upolu ina ua tulai mai ma faaulufale le faigamalo fou ma faapea atu ia Tuilaepa “Aua gei tuufaua le malo”.
O lea mataupu na faaleo ai foi manatu o tapaau a le Saleologa ma faapea ai Tautua Ioane e faamagalo atu i matai uma na savalia le HRPP ona o le latou gaioiga na fai.
O le amataga o le vaiaso na faailoa ai e le HRPP le latou faamoemoe mo le Aso Tofi e ala i se solo a taavale e taamilo i le motu tele amata atu lea i Salelologa e faaali ai o latou lagona ma manatu i faaiuga a le faamasinoga.
Peitai o lea ua maea se fonotaga a Salelologa ma faapea mai e sa eleele ma fanua o lea afioga ona tu vae iai se solo a le HRPP.
