“Ia sui ai le olaga”, o le taula’iga lea a le Transformation Academy ae o se miti a le faauluuluga o le matātā eseese, le afioga ia Namulauulu Makisua Mac Andrae Fatialofa Faletutulu ma ana paaga.
O le faavae ai o lenei a’oga matātā eseese, na manatu Namulauulu o se avanoa lea e fesoasoani atu ai i le to’atele o fanau ma tupulaga o loo iai le tomai i nisi o matātā e pei o le taleni o le musika ma le kamuta.
I le faatautaiga o lea a’oga, na ta’ua e le alii pule faapea sui o loo faatino nisi o polokalame mo le Transformation Academy, e lē tutusa ma auala poo metotia e pei ona faaaogā e le tele o a’oga, e pei o le su’esu’e i tusi ma silapasi ona fai lea o su’ega, peitai o le Transformation Academy e a’oa’o e ala i faatinoga (practical).
O le manatu e to’atele nisi o fanau e telē ma lautele lo latou iloa pe a faatino polokalame, o galuega e pei ona ta’ua e Namulauulu, “o mea e fai i lima”, nai lo o le saofa’i i totonu o le potu a’oga.
Ma o le faasolo ai o a latou polokalame, ua tonu ai o latou manatu e tatala le faitoto’a e fesoasoani ai i le lautele.
Ua ono (6) nei tausaga o faatino pea lea auaunaga ma ua aloa’ia foi lenei matātā eseese i lalo o le NZQA i Niu Sila nei, e pei ona faailo e le pule ma ana paaga, o le a’oga e lē gata ina fesoasoani i le tau atia’eina o taleni ma agavaa o fanau ma tupulaga ae faapena ona maua ai a latou tusipasi e fesoasoani i le tau sa’ilia ai o a latou galuega.
Na faasoa foi le alii pule ua mafai ona galulue faatasi ma le malo o Samoa mo le tele o tausaga ma i le galulue ai e tuu atu le lagolago i nisi o afioaga i le atunuu, o lea na faatino ai se polokalame faata’ita’i poo se pilot program i le itu o Aleipata e pei ona iai afioaga o Samusu, Lalomanu, Saleapaga ma Lepa.
Ta’ua e to’a sefulu (6) fanau mai lea polokalame ua mae’a a’oa’oga, ma ua sauni atu ai nei sui o le Transformation Academy e patipatia galuega mae’ae’a a nei fanau ma i latou uma o loo auai i lea polokalame.
I le galulue soosoo tau’au ai ma le malo o Samoa ina ia maua e a tatou fanau ma tupulaga o faamanuiaga, ua faapena foi ona aloa’ia e le Samoa Qualifications Authority poo le Pulega o Faailoga ma Tusipasi Taualoa a Samoa a’oa’oga o lenei auaunaga i Samoa ma o le a faapena ona maua foi tusipasi taualoa a nei fanau i le mae’a o la tou a’oa’oga.
Tapena mo se Koneseti
O lea ua tapena sui o le matātā e aga’i atu mo Samoa ma le faamoemoe e faatino se koneseti i Aleipata e patipatia ai taumafaiga a fanau ua mae’a a’oa’oga a o polokalame faalea’oa’oga o le a faatino i le atunuu.
Na faailo e to’atele nisi o tagata ua iloga i le taleni o le musika o le a faafiafia i le aso o le koneseti e pei o Mr Tee, Pen Lemi & SJ Paulo, Mautoatasi, Lagi Matautia, ma Mr Kiei, ma o le a faafiafia ai foi nisi o sui o le a’oga i lea po.
O le a faatautaia lea koneseti i le Aso Faraile, 18 o Oketopa, 2024 i le itula e 7 i le faletalimalo tu matafaga le Faofao Beach Fales i Saleapaga.
Ma o le a taatala mo soo se tasi lava e aga’i atu e molimau ma maimoa foi i lea koneseti.
