Ua valaau nei Helen Clark lea sa avea ma Palemia o Niu Sila i tausaga ua tuanai ina ia taofia le silasila i le faaaogaina o fualaau faasāina o se solitulafono ma ia aua ne’i toe faafalepuipuiina i latou e faaaogaina.
Fai mai Clark o le faauluuluga o le Global Commission on Drug Policy e pei ona lipotia i le televise tasi, o atunuu e tatau pea ona faatulafono fualaau faasāina ia tai pei lava o le faiga o loo faia i le avamalosi ma le tapaa.
E talitonu Clark e pei ona faailoa i le lipoti o le aufaitulafono e ao ona o latou faataitai i le faiga o loo faia i le ACT, le laumua o Ausetalia lea e amata atu i le masina o Oketopa, o tagata e maua iai sina vaega o fualaau faasāina e pei o le mdma, heroin ma le aisa o le a lē toe faafalepuipuiina ae o le a totogi le faasalaga tupe e 100 tala pe tuuina atu i polokalame e faatatau i le faaaogaina o fualaau faasāina.
O loo iai Clark i Melepone i le fonotaga lea sa ia faia ai lea faamatalaga.
