Na matuā faate’i e le alii o Lupesoliai Joseph Parker, le alo o Samoa o loo taalo mo Niu Sila, le lalolagi o faipelega ina ua manumalo i se malo maoa’e, i le la fusuaga ma se tasi o toa manumanu o lenei taaloga, le alii Amerika o Deontay Leshun Wilder, ina ua auaufaatasi uma le laulau o faamasino e toatolu, e tuuina atu le manumalo ia Joseph Parker o Niu Sila.
O lenei fusuaga na faia i Saudi Arabia, i le vaveao o le Aso Toonai, aso 23 Tesema 2023.
Na mae’a uma taamilosaga e 12 o le fusuaga, ma aumaia ai le iuga o sikoa a faamasino taitasi e manumalo uma ai Joseph Parker, i le 118-111, 120-108, 120-108.
I nisi o faamaumauga o loo ta’ua ai o lea faatoa lona lua ia Parker ni tama fusu ua mafai ona faatoilaloina le alii ta’uta’ua o Deontay Wilder.
Na maitauina i feupuaiga a o lumanai lenei fusuaga, faamatalaga faualuga a le alii o Wilder i lona talitonuga mautinoa, e lē faigata ia te ia le la taaloga, sa iai foi ana lafoga e peiseai sa taufaalili pe taufaifai ia Parker.
Peitai na matuā ese foliga na tulai mai ina ua faasolo taamilosaga uma, lea o loo toe faamatilatila pe highlight mai pea i luga o upega tafailagi o taaloga, nisi o vaaiga maoa’e na iai lea fusuaga.
Na vaaiga ua tau lē mafai ona silasila sa’o atu le manager ma i latou uma sa lagolago ia Wilder, ae ua na o le u’umau o foliga ma le gatete a o fesalia’i solo mai e Parker i ana so’a malolosi na lavea tonu ai foliga o si alii uli, a o taumafai e talitali atu le malolosi o tu’i a Parker, seia oo ai lava ina mae’a le taaloga, ae ua matuā matilatila mai le mamao o le manumalo o le susuga Lupesoliai Laauli Joseph Parker.
I le mae’a o le taaloga na taumafai ai le alii o Wilder e fai atu sana faamatalaga i ana uo ma i latou uma e taumulimuli i ana taaloga, ma fai mai Wilder, ‘O la’u tala moni lava, ou te lē iloa poo le ā le mea lea na tupu; ua lē iloa pe aisea na lē gaioi ai o’u lima i le tulaga sa tatau ona iai, ae talosia o loo lava pea le tou onosai e tou te toe maimoa mai ai i se isi a’u fusuaga e toe fai.’
Sa faamalie mai Wilder i ana paaga, ma lana folafolaga, o le a toe foi mai i se taimi.
Sina Talaaga o le fusu a Deontay Wilder: O Deontay Leshun Wilder na soifua mai ia Oketope 22, 1985, ma o ia o se alii Amerika e taalo fusu faapolofesa, na ia umia le title o le WBC heavyweight mai le 2015 e oo i le 2020.
O lona manumalo i lena fusi na tulai mai ai Wilder o se uluai alii Amerika e avea ma siamupini o le lalolagi i le paga Heavyweight talu mai le 2007, o se taimi sili lea ona umi i le talafaasolopito o fusuaga ua lē toe avea ai se alii Amerika ma siamupini i le paga mamafa poo le Heavyweight.
Talu mai Aperila o le tausaga talu ai, 2023, na faatulaga mai ai Wilder e le mekasini o le The Ring, ESPN ma le Transnational Boxing Rankings Board, o ia e lona tolu i le lalolagi o se alii fusu sili ona maoa’e i lenei taaloga, ae e lona lima i le faatulagana a le BoxRec.
Na tuai ona amata le taleni fusu a Wilder, o le 20 o ona tausaga na faatoa amata ai ona fusu, ma na manumalo i le pine apamemea i le vaega o le heavyweight i taaloga o le Olimipeka 2008, o inā na amata ai ona faaigoa e tagata o le “The Bronze Bomber”, tai pei o le igoa valaau o le alii o Joe Louis, sa iloga i le igoa o le “The Brown Bomber”.
E lauiloa Wilder i le matautia o le malosi o lana tu’i, lea e oti uma ai ana paga sa latou taaalo ma manumalo ai, ma ua faamatalaina o se tasi o tagata e matuā faigata lava tatali le malolosi o ana tu’i i le talafaasolopito o le taaloga o faipelega.
O le taimi nei o loo faapaseneina ana manumalo i le tu’ioti i le 97.67%, o se pasene sili ona maualuga i le talafaasolopito o le paga heavyweight, ma o le 20 o na tu’ioti (48%) e tupu lava i le taamilosaga muamua.
E faatolu ona manumalo i le faailoga Premier Boxing Champions Knockout of the Year (2016, 2017, 2019) ma o ia foi na manumalo i le faailoga Ring magazine Knockout of the Year (2019).
