Ua amata faagasolo mo le umi e tolu vaiaso le tusigaigoa aoao a le atunuu o le a iloa ai se siitaga o le a iai le aofaiga o tagata Samoa i le tuanai o le lima tausaga o le tusigaigoa tele na faia i le tausaga e 2016.
O le tusigaigoa lea na faamauina ai le faitau aofai o tagata o le atunuu e 195,843, i lea aofaiga e 100,825 alii ae 95,081 tamaitai. O le sootaga e 8,023 tagata e faatusa i le faitauga aofai o le tusiga igoa i le tausaga e 2011 na faamauina ai le faitau aofai o tagata o le atunuu i 187,820.
O le Ofisa o Numera Faamauina a le Malo o loo feagai ma le tusigaigoa tele na amata i le Aso Gafua o lenei vaiaso ma ua vaevae ai le aufaigaluega i Upolu ma Savaii ma motu o Manono ma Apolima.
O le faamoemoe ina ia aoina mai o faamatalaga uma i le aofaiga o tagata i se aiga faapea le tulaga o loo iai lo latou tamaoaiga aemaise le faamauina o le aofaiga o fale.
