E tulaga ese foi faamatalaga i se mataupu na fofogaina i le faamasinoga faaitumalo i Aukilani i le asō e faatatau i se tamaitai na ia tautino i le nanāina o le tinomaliu o lana pepe ae na te le manatua le taimi na ola pe fanau ai le pepe i le falemai.
Ua faailoa i le lipoti a le Radio NZ ua faamaonia moliaga o lea tamaitai i le faamasinoga e pei ona saunoa ai le faamasino o Judge Stephen Bonnar, ua ma’umau se soifua ma o le a lē mailoa lava pe na faapefea ona tupu lea tulaga ae o le mea moni o le nanāina o le fanau mai ma le maliu o le pepe o se tulaga ogaoga tele.
Na saunoa le faamasino e malamalama i aafiaga o gasegase o le mafaufau sa aafia ai le tamaitai e pei ona ta’ua ma talosia ia faataatia ese lea mataupu ma lona mafaufau ae toe faaauau le soifua mo le agai i luma.
O lē na tuuaia sa aafia i se tulaga e faaigoaina i le faaperetania o le dissociative amnesia o se tulaga e poloka ai i le mafaufau nisi o faamatalaga aemaise pe afai o ni tulaga le manuia ma mafatia ai.
Fai mai le faamasino e ui ua teena le talosaga a le loia a lea tamaitai ina ia ave i tua le mataupu e aunoa ma se faamaoniga o se solitulafono ae ua faasāina ona faailoa le igoa o le tamaitai i ni faasalalauga ma o le a mafai lava foi ona maua sana galuega pe a talosaga e tusa lava pe ua faamaonia le solitulafono i lea mataupu.
