O Lea ua faamālōlō lē tumau le faauluuluga o Galuega faaleoleo o le gataifale i le Matagaluega o Leoleo ma falepuipui o le Kapeteni foi lea o le vaa leoleo o le Nafanua II le susuga ia Taito Sefo Hunt. O Lea alii o loo ia umia le tulaga faaleoleo o le Police Superintendent.
O le faaiuga o le vaiaso ua mavae na faailoa ai e le tamaitai sui Komesina o leoleo le susuga Papalii Monalisa Tiai Keti lea faaiuga i le matagaluega atoa ae o le Aso Tofi 26 o Aukuso na amata ai ona faamalolo lē tumau lea leoleo sinia.
O loo tālia se taunuuga o le suesuega faalotoifale a leoleo i le mafuaaga o le faaletonu ua pa’ulia ai le vaa leoleo o le Nafanua ll faapea foi se sailiiliga e ala i se komisi suesue ua finagalo le Kapeneta ua tatau ona faatino e iloa ai se tulaga aoaotetele o le mafuaaga o le faaletonu.
Ua maea ona faia le galuega ua aveesea ai suauu mai le vaa leoleo ina ia saogalemu le gataifale i le ono sao ai o ia tulaga ina Ia malu puipuia pea le siosiomaga o le gataifale o Samoa.
