O le mamafa o timuga i le Aso Gafua na avea ma aso mālōlō e faamamalu ai le Eseta i Samoa, o le mafua’aga lea o le osofia e tafega o vaitafe o nisi o vaega o alatetele i le taulaga e pei o le magatolu i Pesega.
Na osofia foi nisi o auala e sopo’ia e vaitafe e pei o le ala kolosi i Moamoa Fou lea na tapunia i le aso ananafi, ae o le Aso Lua o lenei vaiaso ua galulue ai se konekarate mo le toe faaleleia o lea auala, ona o loo fesoota’i ai aiga o nofoia lea vaega o le atunuu i Upolu.
Faaalia e le pulega o feoa’iga i le laueleele le Samoa Land Transport Authority ua mae’a uma su’esu’ega sa faatino aemaise o tapenaga mo le fausia o se auala kolosi mautū poo se Bailey Bridge i Moamoa fou ma ua mae’a ona faasalalau tauofoga mo se kamupani na te faia lea galuega.
O le masina o Aokuso o le tausaga nei ua faamoemoe e faatino ai loa lea galuega.
Sa molimauina foi i le motu o Savaii i le vaiaso na te’a nei le aafia o nisi o aualatetele i tafega malolosi ona o timuga mamafa sa aafia ai foi lea vaega o le atunuu.
E iai le talitonuga o le faai’uga o le masina lenei o Aperila e muta ai le tau o afā ma timuga mamafa i lo tatou atunuu.
