E lē la ma le laina le tulaga o iai lenei faafitauli ogaoga i sauaga faalotoifale o loo aafia ai tina ma tamaitai i le atunuu ma e ui ina iai le tulafono e le o tele se malamalama ma se silafia o tagata iai.
O le ala lea o le faafoe e le Matagaluega o Faamasinoga o se polokalame e faalauiloa ma toe matimati ai nisi o vaega ma valaaulia ai le mamalu o le atunuu e fofogaina finagalo ma manatu e tusa ai o lenei tulafono.
Saunoa le Minisita, Afioga Vasati Sili Pulufana o se faafitauli matuia sauaga e pei ona aafia ai tina ma tamaitai ma e manaomia ai ona toe faapupula lenei vaega i le atunuu.
“I totonu o le Pasefika e tusa o le 2/3 o tina ma tamaitai o loo feagai ma sauaga e faatinoina lea e o latou taitoalua ma paaga.
“I totonu o le lio o tulafono o le amiotonu a le Matagaluega o leoleo ua lē utuva mataupu o loo oo mai ai ona o sauaga eseese o loo faatino i totonu o le lotoifale.”
O se vaega e moomia tele ai le galulue faatasi e pei ona ta’ua e Vasati ina ia tineia lenei faafitauli, o lea ua matuā moomia lo tatou galulue faatasi ina ia tineia lenei faafitauli.
“O le pasia o le tulafono mo le saogalemu o aiga 2013 ma le faavaeina o faamasinoga o aiga ma sauaga o se tulaga ua atagia ai le alia’e pea i luma o soo se ituaiga soligatulafono ae le gata i lea o sauaga matagā tuulafoai e pei ona oo atu ai i luga o le faamasinoga maualuga.
“O lea ua atoa le 10 tausaga o lenei tulafono peitai o le luitau ma le fesili tele o loo tulai mai, pe o lelei ea ona faatino lenei vaega.
“O le saogalemu o aiga o le tiute fai faatasi o le auga ma le faamoemoe ina ia faalauiloa lenei tulafono i le atunuu auā e ui ua loa tausaga o lenei tulafono ae o le toatele o le atunuu e le o silafia puipuiga i lalo o lenei tulafono aemaise lava i latou sa sauaina.”
O nei vaega uma ina ia mafai ona lagona finagalo o le mamalu o le atunuu e ala i vaega o tulafono a le Faamasinoga i vaega tau sauaga o tina ma tamaitai e matimati ai vaega e ao ina toe silasila iai le faamasinoga ae le gata i lea o le faamalamalamaina i le atunuu o nei tulafono auā le nofo silafia.
