Ua aumai se faamatalaga faalaua’itele mai le pulega o le Lakapi Samoa ua faailoa ai, ua latou silafia ni su’esu’ega a leoleo i ni tuua’iga tau solitulafono faasaga i le faia’oga ulu o le aulakapi a le atunuu le Manu Samoa, le susuga Mase Mahonri Schwalger.
O le taimi nei o loo ave le lagolago a le Lakapi Samoa i su’esu’ega o loo faia e leoleo peitai o le a lē toe aumai se isi faamatalaga ona o le puipui ia i latou uma o loo aafia i le su’esu’ega.
E taotao tua le faamatalaga faalaua’itele lea i ulua’i lipoti na faailoa ai i le faai’uga o le vaiaso le molia e leoleo o le faia’oga ulu i ni moliaga e aafia ai ni tuua’iga o feusua’iga faasolitulafono faasaga i le faia’oga ulu.
O se finagalo o le Komesina o leoleo na tuuina atu i le nusipepa o le Samoa Observer i le faai’uga o le vaiaso na te’a nei, o loo faailoa ai e le Komesina o Auapaau Logoitino Filipo, e lima moliaga ua faia a leoleo faasaga ia Mase Mahonri Schwalger ma o le aso 4 o Novema le valaauga muamua i le faamasinoga o ia moliaga.
O loo tatala i tua le faia’oga ulu i ni aiaiga e aofia ai le saini i le ofisa o leoleo i Faleata faalua i le vaiaso, ma ua taofia foi lona tusifolau.
E to’alua ni tamaitai ua la faaulu lea tagi i leoleo ma ua faaalia i lipoti o ia tamaitai o ni tauaiga o lē ua molia.
