O loo faaauau pea tauvaga i le va o Amerika ma Saina, poo ai o i laua e leotele i totonu o le Pasefika.
E lua masina talu ai na asiasi mai ai le failautusi o le malo tele i le Pasefika, ae o le vaiaso fou o lea o le a sau le failautusi o le ami e asiasi mai i Papua Niu Kini ae faaiu ai i Ausetalia.
O lea foi e lei mamao atu le faigamalaga a Saina na alu i le Atu Kuki ma feiloai ai ma le Palemia ia Mark Brown, o ia foi o le faatonu o le Pacific Islands Forum.
E le gata i lea o le vaiaso talu ai lea na asia ai foi e le Palemia o Solomona Beijing i Saina, ma i lipoti e le tasi se maliega na sainia i lea feiloaiga.
O se tasi o ia maliega o le a faataga ai leoleo mai Saina e leoina le taulaga o Solomona seia oo i le 2025.
O se maliega ua fai mai ai le minisita o le va i fafo a Niu Sila, e le o nofonofo lelei ai Niu Sila, Ausetalia faapea le malo tele o Amerika ma ua talosaga le minisita o Nanaia Mahuta ia Solomona faapea Saina e faailoa mai le atoaga o le maliega ua sainia.
Mai le Pentagon i Amerika ananafi, o le feiloaiga ma Papua i le vaiaso fou, o le a toe talanoaina ai le maliega na sainia i Port Moresby i le masina o Me, faapitoa lava foi i le leoina faapea auaunaga faamiliteli.
