Ua vaavaai le kamupani vaalele a le Ea Niu Sila ia maua le initeneti i luga o faigamalaga a vaalele o loo feoai i totonu o le atunuu.
O le initaneti maua fua nei o loo galulue ai le Ea Niu Sila ma le kamupani satelite a Elon Musk, StarLink e faapipii masini e maua ai le initaneti, ma o le faaiuga o le tausaga fou o loo vaavaai iai, e faamoemoe afai ae manuia o le a faaaogā loa.
O se poloketi ua faaalia e se tasi o sui o le pulega a le kamupani vaalele, e lē taugofie, peitai e maualalo atu lona tau nai lo le faaaogā o vaalele o loo feoai i le va o Niu Sila ma isi atunuu.
E lē o vaalele laiti uma e fetaui mo lenei fuafuaga.
O le agai ai o le Ea Niu Sila e faaaogā satelite a le Starlink, ua faaopoopo ai i le lisi o kamupani telefoni tetele i Niu Sila lea foi ua mae’a sainia maliega e faaaogā ai fesootaiga tau satelite nei i nofoaga e lē malosi ma manino ai fesootaiga atoa ai ma taimi e tutupu ai mala faalenatura.
