Ua lipotia i le 9News i le asō o tagata faigaluega o le Qantas na aveesea mai galuega i le taimi o le Koviti-19, ua atili latalata atu i le maua o ni taui tetele ona o ni gaioiga sa faia faasolitulafono e le kamupani vaalele.

O le Transport Workers Union ua o latou ave le Qantas i le Faamasinoga Federal Court i le mataupu lenei ina ua aveesea nisi o le aufaigaluega a le kamupani vaalele mai galuega ia Novema 2020.

O le faai’uga ua faailoa mai e le faamasino sa feagai ma le mataupu lea, Justice Michael Lee ua faatonuina ai le Qantas e totogi le $170,000 i tagata faigaluega e to’atolu na aafia i le mataupu lea ma ua ta’ua o vaegatupe o le a maua e nei tagata faigaluega ua faamoemoe e fai ma faavae o le aofa’iga o tupe e malilie le Qantas e totogi i tagata faigaluega e aafia i ni faai’uga faapea i le lumana’i aemaise i feutana’iga ma le iuni.

O le aso 15 o Novema e toe valaauina ai le mataupu i le faamasinoga ma faafofogaina ai e le faamasino finagalo faaalia i le aofa’iga o le taui e tatau ona totogi e le Qantas.

Sa teena foi e le faamasinoga i le 2021 le talosaga a le Iuni ina ia toe faafaigaluega tagata e to’atolu ia i le kamupani ma o le a tālia le aso 15 o Novema mo se isi lipoti lata mai o lenei mataupu.

Puna o Faamatalaga: https://www.9news.com.au/national/qantas-unlawful-pandemic-layoffs-decision/97623e9d-adc5-4346-96b7-94f17b72fc92