O le Aso Lua o lenei vaiaso ua amata aloa’ia ai le fesoasoani a foma’i ma tausi soifua o le fitafita a le malo o Amerika, lea o le a maua ai e o tatou tagata le avanoa e vaaia ai ia foma’i ma maua togafitiga e aunoa ma se totogi.
O le maota gasegase i Motootua o le a galulue ai nisi o foma’i e faia ta’otoga, faapea le vaaia o nifo poo oloa.
E lē gata o le a maua lea fesoasoani i le maota gasegase o Tupua Tamasese Meaole, ae faapea foi i falema’i faaitumalo i Faleolo, Lufilufi, ma Lalomanu i le motu o Upolu.
O Savaii o le a maua ia foma’i ma tausi soifua i le falema’i i Tuasivi, o Safotu, ma Sataua.
O le Aso Lulu o le vaiaso a sau o le aso mulimuli lea e maua ai e lo tatou atunuu lea fesoasoani a foma’i ma tausi soifua o le fitafita a le malo o Amerika, ua faaigoaina le latou polokalame o le Soifua Manuia.
