Ua faagasolo i le vaiaso nei le faatulagana o le amata faaaogāina o le Brisbane Metro lea ua faamatala o se tasi lea o suiga tele i le aai i auaunaga o femalagaa’iga lautele a le Setete ma o lona vaega muamua lea ua faatinoina.

I le mae’a o le tele o tausaga o faatuai pea ma iai foi nisi o faafitauli, o lea ua faailoa mai ua latalata lava ina avea o se vaaiga o le a masani ai tagata i magāala o Brisbane.

O loo muamua faata’ita’ia i le train e tasi le Brisbane Metro pei ona faaaogāina i Sini ma o le M2 lea ua fuafua o le a amata ai i le va o UQ Lakes ma RBWH ma faasolo atu ai i lona vaega lona lua e faalauiloa i le kuata lona lua o lenei tausaga i le va o Roma St ma Eight Mile Plains.

Fai mai le sooupu o le vaega o loo faagaioia lea auaunaga o le Metro e tatau ona iai ona aafiaga lelei i femalagaa’iga i alatetele ma o le a faaitiitia ai foi le poloka o auala i Brisbane.

Ua faailoa e le Alaata 9 o Metro ta’itasi o le a faaigoaina i tagata iloga o Brisbane ma o le alii lauiloa i le lakapi liki, Darren Lockyer lea o le a mua’i faaigoa ai le vaega muama o lenei fuafuaga.

Ua una’ia foi e le pulenuu o Brisbane tagata ina ia tuu ane finagalo faaalia mo igoa o isi Metro o le a faatautaia a o faasolo le tausaga.

O le Metro o ituaiga trains i lalo o le palapala, underground, e okometi ma saosaoa atu nai lo trains ua masani ai le to’atele.

Puna o Faamatalaga: https://www.google.com/amp/s/amp.9news.com.au/article/d1e8f60b-91e5-4a77-9acf-2c7711f3b247