Ua faamaonia mai nei e le Health New Zealand, o le pasese Kiwi sa i luga o le vaa la’upasese poo le meli o le MV Hondius na māua ai le aafia o tagata i le Hantavirus, o se tagata e seāseā lava aumau i le atunuu.
E moni o se sitiseni o Niu Sila, ae faamauina e tele ina malaga ese atu ma le atunuu mo se taimi umi.
I ripoti talu ai sa faamauina ai e na o le to’atasi le tagata Kiwi, ae peita’i o lea ua māua sa iai se isi tagata Kiwi na alu ese mai ma le MV Hondius, ae faato’ā faailoa mulimuli ane le faafitauli o le pepesi ai i luga o le vaa la’upasese lea o le Hantavirus.
Ae o le isi tagata Kiwi na iai pea i luga o le vaa se’ia oo lava ina taula i le Canary Islands, o lea ua faanofoesea i Ausetalia.
Ta’ua e le Faatonu mo le Soifua Mālōlōina Lautele, Director of Public Health, Corina Gray o lea ua fautuaina nei e auaunaga faapaaga mai fafo ina ua māua le ono aafia ai o le tagata Kiwi lenei i le faama’i.
O lea foi ua faailoa le tuuina atu o le fesoasoani a le Ofisa o le Va i Fafo i tulaga o e ono moomia ai le fesoasoani.
E to’atolu le pasese na malaga atu i lenei vaa ua maliliu mai le Hantavirus, e aofia ai se ulugalii Dutchman poo ni tagata mai Netherlands, ma se tagatānuu Siamani.
O loo iai pea se tama’ita’i Farani i tulaga tigāina i le falema’i ina ua faamaonia lona aafia ai i le faama’i.
I ripoti mai le leitio faavaomalo a Niu Sila, o lea na faamauina ai e le auaunaga o le soifua mālōlōina o le faama’i o loo pepesi o lona ituaiga o le Andes strain, e masani lava ona pepesi solo e tauala mai i fe’au mamao a manu ua faaigoaina o rodents, faailo e iai lava taimi e ono aafia ai tagata soifua i tulaga o le vavalalata o le tasi i le tasi poo le vaega ua ta’ua o le close contact.
O āuga e aofia ai le fiva, o le tigā o le ulu, o le tigā o maso o le tino ma le vaivai tele, ma le aafia ai o le manava.
Ta’ua e se tasi o tagata poto i tulaga o faama’i pepesi mai le iunivesite o Aukilani, o le vairusi o le Hantavirus, e lē maua i rodents a Niu Sila, ae afai ae maua ai se tagata Kiwi, o lona uiga na pesia mai i atunuu i fafo.
Faamanino e le The World Health Organisation (WHO) e tusa ai ma a latou sa’ili’iliga, o loo iai le talitonuga na amata ona aafia le ‘aupasese i le taimi a o faatautaia ai nisi o polokalame poo activities a o iai i Amerika i Saute.
Puna o Faamatalaga: https://www.rnz.co.nz/news/health/595110/kiwi-onboard-hantavirus-hit-cruise-ship-doesn-t-usually-live-in-new-zealand
