O le auina atu pea i fafo o nisi o gasegase mai Samoa e faia ai togaftiga ma faaopoopo ai pea tupe faaalu mo lea polokalame, ua silasila ai nei le malo e toe asiasi i le tulafono e galulue faatasi ai pulega a nuu ma le malo, i le una’ia o polokalame faasoifua mālōlōina.
O le faamoemoe o lea tulaga ona ua faaalia e le Palemia ua tatau ona toe faamalosia puipuiga o le soifua mālōlōina o le atunuu mai gasegase lē pipisi e pei o le suka, toto maualuga, ma gasegase o le fatu.
Ua faailoa lea finagalo o le Palemia susuga Laaulialemalietoa Leuatea Polataivao Fosi i le feiloa’iga talu ai nei ma tusitala, ina ua pasia ai e le Kapeneta se isi tupe faaopoopo mo togafitiga o gasegase i atunuu i fafo.
E lua miliona lea vaegatupe ua faaopoopo i le silia i le 10 miliona na pasia mo togafitiga i fafo i lalo o fuafuaga o le tala o le tupe i le tausaga faaletupe o loo faagasolo i le taimi nei.
