Ua teena ma ua lē talia nei e le vasega o ‘au ilolilo le talosaga e palola ai se alii na ia taofia faamalosi se tama’ita’i e faaaogā ai se laaumalosi mo le 15 itula; e aofia ai ma lona musuā e faalogo i le taumafai atu o leoleo i le tausaga 2024.
O lē o loo molia e igoa ia Phillip Clinton Mant, ma o loo falepuipui mo le 5 tausaga ma le 2 masina.
Na faailoa e le faamasinoga, o se gaioiga e matua’i telē lava lona aafiaga, ma le sauā tele, ina ua ia ulufale faamalosi i totonu o se fale ma se laaumalosi i lona ituaiga o le 22 rifle o loo iai ni pulufana, faatasi ma nisi o ‘au’upega; o le pomu na ia fausia ma se silencer ma ututau.
Faamauina i ripoti o lenei matāupu e faapea, na faamalosi ona ia taofia se tama’ita’i ma si ona tuaa tamā e 80 tausaga o lona soifua e faaaogā ai se laaumalosi, ma tuu i autafa o si māfine se pomu ma lana tala o le a ia faapāina le fale ma tagata uma o iai i totonu.
Na faailoa e lea alii, e na o le pau le taimi e oese ai mai le fale o le o i totonu o pusaoti se’i tulou.
I le mata’utia tele o lenei faalavelave, na māfua ai le tapunia o a’oga, o falema’i na tutū latalata ane i le fale, ma le tapunia ai o auala mai le toe uia e le lautele, ma na faailoa foi le faitau afe o tagatānuu o loo aumau i lea faaitu na aafia.
I le faatautaia ai o le faatalanoaga mo le talosaga o palola i le falepuipui i Rolleston, o lea na molimau manino lava le alii o Mant, o lona lē talia lava o fesoasoani na tuuina atu ia te ia, faapea le malosi o fualaau faasāina ma le ‘ava malosi, faapea nisi o ma’i o le mafaufau, na māfua ai lava ona faateteleina ana faiga ma gaioiga e pei ona ia faatinoina.
Na faapea mai atili lea alii, o le tele o faafitauli, le mamafa o le mafaufau i matāupu faalotoifale o ia ma lona aiga, ma matāupu faaletulafono, na atili ai lava ona lē sa’o lona mafaufau ae lilifa e faatino ia gaioiga.
Na ia faailoa sa iai foi le fesoasoani, peita’i e na te le’i taliaina lava.
Ta’ua e le vaega o iloilo poo le laulau e nafa ma palola, o le mata’utia tele o moliaga ma mea na fai e Mant, e taga’i ai i le iloiloina o nofoaga poo sone e lē tatau ona toe vaaia o iai lea alii i le taimi e tatala ai i tua.
Ma afai e tatala i tua, e fautuaina Mant e nofo i se isi itumalo poo se sone e mamao ese mai le sone na tula’i mai ai le matāupu.
Faamauina i ripoti mai le NZ Herald, o lea na faailoa e le faamasino, Judge Edwin Paul e tatau lava ona faatino se iloiloga i le soifua mālōlōina o le mafaufau o Mant, e iloa lelei ai pe o iai se popolega i tagata lautele i le tatala ai o Mant mai le falepuipui, aemaise lava ina ua faailoa atu e le tama’ita’i na aafia lona fefe tele ma tulaga o le tatala ai o Mant i tua.
Na teena e Mant ona moliaga e aofia ai le ave ma taofia faamalosi o se tagata, o lona taufaamata’u e faaoo le oti, o moliaga o le umia o laaumalosi, ma e faaalia e faato’ā maua le avanoa mo se isi talosaga o le palola i le tausaga fou i le masina o Me.
