Ua teena e se tinā mai Canterbury ona aafiaga i le maliu ai o lana pepe, a o faasolo se su’esu’ega i le matāupu i Kalaiesetete.
E 4 masina o Soul ae uma lona ola i le tausaga 2014, ina ua aafia lona ao poo lona ulu ma e faapea e fai lava sina ogaoga o manu’aga o sia alualutoto, e pei ona māua na ta’e le ulu ma i’u ai lava na sao le toto i lona fai’ai tulou.
Faaalia e ui i le maliu ai o sia tamaitiiti e lei iai sē ua molia, ae o loo iai lava le masalosaloga a leoleo a lē o le tinā o le pepe le tama’ita’i o Storme Turany na maliu ai sia alualutoto, o lē sa o la faatasi i lena taimi poo lana uo faapouliuli o Tony Farmer na maliu ai Soul.
I le tuuina mai ai o molimau i le faamasinoga – Coroners Court i Kalaiesetete, na finau pea Storme Turany e leai sona aafiaga i le maliu o si ana tama.
I le folasia ai o lea matāupu i le faamasinoga, na faamatala na amata ona vaaia foliga ma’i o sia alualutoto i le taeao o le aso 30 o Aokuso, i le mae’a ai foi o le po atoa e lē moe lelei ae na o le tagi.
Faamatala e le tinā i le vaega o pule o maliu poo le coroner na ia tuu atu le pepe i lima o lana uo o Tony Farmer, ae alu i fafo e vili le laina o le auaunaga a le soifua mālōlōina le Healthline, ma i lona toe foi atu i totonu o le fale na toe tuu atu ai e Tony Farmer Soul i ona lima ua matua’i vaivai lava, ma ua lē iloa foi se mea.
Māua foi le fesiligia ai e le faamasinoga Storme i le molimau a lona uso, lea na ia faamatala ai se taimi na ia vaaia ai Storme o ato Soul i luga o le moega.
Ae na teena e le tinā ia tuua’iga, ma ia faapea atu e leai ma se tulaga faapea na ia faia.
Faamauina na amata le masaniga a Storme ma Tony mai luga o le Tinder, i le faato’ā fanau ai foi o Soul, ma e faamatala pe atoa lava le masina o nonofo faatasi i latou nei ae tula’i mai loa ma le faalavelave.
Ta’ua i ripoti o le a sosoo ai ma le tuuina mai o le molimau a le alii o Tony Farmer e tusa ai ma lenei matāupu.
Puna o Faamatalaga: https://www.rnz.co.nz/news/crime-and-justice/595072/mother-denies-any-role-in-baby-soul-turany-s-violent-death
