I le 12 ai lenei o tausaga o faatino pea e le Matāgaluega o A’oga ma Aganuu le polokalame o le toe faaolaola o le tāua o tu ma aganuu i a’oga e ala i le faaaliga o le Samoa Ne’i Galo festival, o le tausaga nei o le a faia ai mo le taimi muamua i le motu tele o Savaii.
O le Aso Tofi o le vaiaso nei i le hall poo se maota tele o le a’oga maualuga o le Don Bosco i Salelologa o le a faagasolo ai lea faaaliga o le a auai Kolisi e valu i Salafai.
O le autū o le faaaliga o le “Ola i lau Aganuu” ma o le a faailoa ai e alo ma fanau nisi o a tatou tu ma aganuu e ala i pese ma siva faapea lauga.
E tolu vaega tāua o le a faamasino iai le faaaliga e aofia ai le faatāua o le va tapuia, faatāua o tu ma aganuu ma le faatāua o le gagana Samoa.
O siva ma’ulu’ulu, o pese faaleaganuu faapea ma le taualuga e faatino e taupou ma manaia o nisi ia o vaega togia o le faaaliga o le Samoa Ne’i Galo.
Ua valaau faaaloalo ai le Matāgaluega o A’oga ma Aganuu i mātua ma aiga ma le lautele o le atunuu latou te molimauina tapenaga uma a kolisi e valu o le a auai.
E ‘auga e tasi le autū o le faaaliga lenei, i le faaaliga foi o tu ma aganuu faa-Pasefika o loo faatino e a’oga maualuluga i Aukilani i Niu Sila i tausaga uma le Polyfest.
O nisi o kolisi maualuluga ua faamoemoe e auai i le faaaliga i Savaii i lenei vaiaso o le kolisi o Alofi o Taoa, kolisi o Amoa, kolisi o Mataaevave, kolisi o Don Bosco, kolisi o Uesiliana, kolisi o Palauli Sisifo, ma le kolisi o Palauli le Falefa.
Ua faailoa mai e se molimau faatuatuaina ua lē auai nisi o kolisi i le motu tele i Salafai ona o nisi o tapenaga tāua o loo feagai ma ia kolisi.
Ua faailoa e le Matāgaluega o A’oga ma Aganuu nisi o fesoasoani ua taunuu atu mo le faaaliga i le Aso Tofi o le foa’i tupe mai le faletupe a le Pasefika ma nisi o oloa e faaaogā i le a’oa’oina o fanau.
