Ua faailoa e Trump i le autusitala o ia e lē mafaufau i tulaga faaletupe a le atunuu a o ia finau mo se maliega ma Tehran.
Ua faailoa i lipoti a le CNN e oo mai i le taimi nei ua oo i le 29 piliona le tau o le taua lea a Amerika ma Iran ae ua faailoa foi i lea lava lipoti e nisi o le ‘au galulue a Trump, o le taimi lenei ua matua’i toe silasila lava le alii Peresetene i le toe amataina o fetauiga i Iran.
Ua lipotia le aga atu o le alii Peresetene i Saina lea o le a talanoa ai ma le ta’ita’i o lea atunuu, Xi Jingping.
I isi lipoti fai mai le CNN o loo popole Isaraelu ina ne’i faia se maliega a Trump ma Iran ae le’i lotea nisi o matāupu autū na āfua ai ona o la osofa’ia Iran.
Fai mai faamatalaga feavea’i a nisi o sui o Isaraelu afai ae faia se maliega a Amerika ma Iran ae lē lotea ai matāupu e aofia ai ‘au’upega o fana mamao ma le polokalame faaniukilia a Iran o le silasila la a Isaraelu e le’i uma lea taua.
I le faato’ā amataga o le taua na faailoa ai e Trump e mana’o Amerika e faaleaga le polokalame o ‘au’upega fana mamao a Iran ma tapunia lona nofoaga faaniukilia ina ia aua lava ne’i fauina ai ni pomu peita’i i le mae’a o le 10 vaiaso ua taula’i feutana’iga i le uranium ma le toe tatala o feoa’iga i le Strait of Hormuz.
Puna o Faamatalaga: https://edition.cnn.com/2026/05/12/world/live-news/trump-iran-war-news
