Ua aloa’ia nei le faamavaega a le tama’ita’i faipule o Judith Collins mai le nofoa o le itumalo o Papakura, i le mae’a ai o le 24 tausaga o tautua i upufai o malo.
O le aso ananafi, Aso Lua na faamavae atu ai Judith Collins ma o se faamavaega na molimauina le talitaliē o sui faipule uma ma sui o le Kapeneta i taga ma faaupuga mālie a lea foi tamalii.
O se tasi ua loa lana tautua, ma ua faamavae ae ua lata i le 18 tofiga faalemalo (ministerial portfolios) ua ia tauaveina, ma o se tasi ua iloga ana taumafaiga ma lona sa’ilimalo i faigāpalota tele, e pei ona māua, e 8 lelei taimi o manumalo i faigāpalota ma e sosoo lava ona manuia ana taumafaiga.
I lana tautalaga mulimuli i totonu o le maota fono, o lea na ia toe tomānatu ai i lu’itau na feagai ma le vaega faaupufai aemaise lava a o feagai le atunuu ma le lalolagi ma le faama’i o le Koviti-19 i le tausaga 2020, na faailoa e Collins sa faigatā ae na le’i solomuli ai le latou vaega mai lu’itau.
E to’atele sui faipule na faafetaia e le tama’ita’i ia Judith i lana faamavaega, aemaise le alii Palemia o le malo Christopher Luxon mo le avanoa na tuuina atu ia te ia e ta’ita’ia ai le 8 o matāgaluega a le malo, i lalo o le faigāmalo soofaatasi, e pei ona avea ai o ia ma Minisita o Puipuiga poo le Defence Force a le atunuu lea sa iai talu ai nei.
Na ia faaalia foi lona mitamita i le tele o fuafuaga a le malo sa mafai ona faataunuuina i lalo o lana ta’ita’iga o matāgaluega, lea na iai le faatagaina ona feoa’i o leoleo ma nisi o auala o puipuiga poo tasers, o le tapu ai ona toe ulaula o se pagota i falepuipui, o le ta’ita’iina o le finau i le su’seu’ega i metotia na faaaogāina i le taimi o le taua i Vietnam poo le Agent Orange Inquiry, ae faapea ai ma le finau ua autausagā o fai mai i fanau o tagata Maori – le Nelson Tenths litigation.
O le tama’ita’i o Emma Chatterton o le a suia Collins, o se sui a faipule mo le itumalo o Papakura.
E faamavae Judith Collins mai upufai o malo ua 67 tausaga o lona soifua, ma o ia foi o se tama’ita’i loia a o le’i avea ma faipule o lona itumalo.
Puna o Faamatalaga: https://www.1news.co.nz/2026/05/12/ten-mps-judith-collins-thanks-for-courage-in-her-farewell/
