I le 3 aso ua atofaina e le malo e faagasolo ai polokalame ua tapena mo le faamanatuina o le 64 tausaga o le tuto’atasi i le masina fou o Iuni, o lea ua manino i le faasilasilaga faalaua’itele a le Matāgaluega o Alamanuia, Pisinisi ma Leipa e na o le tasi le aso mālōlō mo tagata uma.
O le Aso Gafua le aso muamua o Iuni o le aso mālōlō lea e faamamalu ai le aulia o le tuto’atasi o lenei tausaga 2026.
O polokalame o le Sisigafu’a e amata i le Aso Faraile 29 o Me i le solo a ‘autaalo o le a tausiniō i taaloga eseese ua faatulaga mo le tuto’atasi.
O le Aso Toonai 30 o Me o taalolo ma le tatalaina o le ofisa fou mo galuega e tautua ai le fono aoao faitulafono.
O le Aso Sa 31 o le saunigalotu o le tuto’atasi ae Aso Gafua ai le aso muamua o Iuni o le sauniga masani o le sisiina o le fu’a, le malelega faamanuia a le Ao o le Malo ma savali faaaloalo.
Ua iai foi faafiafiaga ua faatulaga mo lea aso, ma faaauau ai i le Aso Lua ae mae’a i le Aso Lulu le aso 3 o Iuni.
E tatala pisinisi i le aso mālōlō aemaise lava i faleoloa peita’i e lē o manino mai pe faaauau galuega masani a le vaega tuma’oti i le Aso Lua ma le Aso Lulu o le a faaauau ai polokalame o le tuto’atasi.
