Ua faaalia le lē fiafia tele o le alii Komesina o Leoleo a Niu Sila, Richard Chambers ina ua ia māua faamatalaga i le toe oo mai i Niu Sila o sui a leoleo mai le Northern Territory e faatino a latou recruitment poo le galuega o le faatauanau atu o alii ma tama’ita’i leoleo mai le atunuu e aga’i atu i Ausetalia e galulue ai.
Faamaonia e Chambers, o lea na tusi atu le Northern Territory ia te ia e tusa ai ma a latou fuafuaga ma polokalame ma o i lea na ia faailoa atu ai loa i lea ituvai lona lē fiafia tele ia latou fuafuaga.
Ta’ua i ripoti pe ā ma le 144 leoleo mai Niu Sila ua malaga atu i Ausetalia i totonu o le 12 masina, ma ua faailoa o le itu a le Northern Territory lea o loo malosi mai lava a latou taumafaiga e auina atu sui mai Niu Sila nei.
Ua faamaonia mai o le to’a 20 o leoleo mai le to’a 22 o i latou faato’ā faauu mai i le masina o Aperila o nisi sa avea muamua ma leoleo o Niu Sila.
Faaalia o le to’atele lava na ioe i le aga’i ai i Ausetalia e māfua mai o le maualuga o totogi ma faamanuiaga o loo maua i lea atunuu nai lo o Niu Sila.
E pei ona faasoa ai se tasi sa avea ma alii leoleo o Niu Sila, Dion Nelson-Screen, i le eseesega ua iai nei lona faigaluega ai i le la foi ituvai nai lo o le mea sa iai i Niu Sila.
E ui i se eseesega o soifuaga ma le mea sa iai i Aotearoa, ae o lona iloa ua manuia ia ma lona aiga i le malaga atu ai i Ausetalia.
Ma e ui i se taumafai a le Matāgaluega o Leoleo Niu Sila e faatino a latou polokalame e faaosofia ai pea le fia aumau o leoleo i Aotearoa, ae ua faailoa le lē mālōlō ai o auaunaga a leoleo a Ausetalia e sa’ili atu pea sui mai Niu Sila nei.
