O tapenaga a le ofisa o le komisi o faigāpalota mo le palota laitiiti a Vaimauga 3 ua amata ai i le Aso Lua o lenei vaiaso a’oa’oga mo le aufaigaluega o le a galulue mo lea faigā filifiliga e toe sa’ili ai se sui usufono o lea itumalo faapalota i le Palemene.
E lē gata ina faagasolo lea a’oa’oga ae ua faailoa foi falepalota e sefulutasi ma le falepalota faapitoa aemaise o le falepalota tau sāvali a o lumana’i le Aso Faraile o le vaiaso fou le aso muamua o le masina o Me o le a faatino ai le palota laitiiti a Vaimauga 3.
O le 11 o falepalota i nofoaga eseese o lea itumalo ua aofia ai le:
- Maota o le EFKS i Magiagi
- Maota o le Ekalesia Aso Fitu o le Toe Afio Mai i Magiagi
- Maota o le Ekalesia Metotisi i Faatoia
- Maota o le Ekalesia Faapotopotoga a le Atua poo le AOG i Leonē
- Maota o le EFKS i Matautu-tai
- Maota o le EFKS i Matautu-uta
- Maota o le EFKS i Tanugamanono
- Hall a le SROS i Papauta
- Maota o le EFKS i Vaoala
- Maota o le EFKS i Vailima
- Maota o le Ekalesia Katoliko i Mālōlōlelei.
O falepalota tau sāvali o le nofoaga o le falema’i faamamā toto i le maota gasegase i Motootua, o le nofoaga i Mapuifagalele, nofoaga o Tama’ita’i Sa Monike i Vailima ma nofoaga o falema’i faaitumalo.
O le falepalota faapitoa i le motu o Savaii o le nofoaga o le Matāgaluega o Tinā ma Tama’ita’i, Atina’e o Afio’aga ma Aga Fesoota’i i Salelologa.
E to’afā sui faatutū mo le palota laitiiti a Vaimauga 3.
