‘O le faama’i i Niu Sila’, o le faamatalaina lea e le Water Safety New Zealand o tagata maliliu i le vai i totonu o Niu Sila peitai o ni faalavelave na ono mafai ona faasao mai ai.
E toa 90 tagata na maliliu i Niu Sila ona ua malelemo i le vai i totonu o le tausaga faatoa uma atu, ma o lea aofai o le 83% o le itupa o alii ma o le 58% o i latou e i luga atu o le 45 tausaga le matutua.
A faatusa le 2023 ma le 2022, ua sau i lalo peitai e lē o se tulaga e ono faamanatu e tusa ma tala a le Water Safety.
O le tausaga foi talu ai o loo iai ma le toavalu fanau i lalo o le ta’i lima tausaga na malelemo ai ma a faatusa i le sefulu tausaga talu ai ua alu i luga.
O Aukilani le aai o loo maualuga le fuainumera o tagata maliliu a o iai i le vai, ma ua valaau mai ai le Water Safety ua moomia le faia o se fuafuaga ma nisi suiga auā le puipuia o tagata i taimi e agai ai i le vai.
Ua faatalosagaina ai foi e le Water Safety le malo ia avea o se tasi o mataupu e ave iai lana faamuamua faapei ona taulai ai i tagata o loo maliliu i luga o auala.
