E to’a limasefulu le vasega fou o alii ma tamaitai ua fia avea ma malu o le malo poo leoleo, ua amata nei ona faagasolo a latou aoaoga i le Kolisi Maualuga o aoaoga faaleoleo i Tafaigata.
O le Aso Lua o lenei vaiaso na faatino ai e le Komesina ma le Pulega o le Matagaluega o Leoleo, Falepuipui ma le Toefuataina se sauniga na faafeiloai ai le vasega fou, lea sa faatino ai le ava o le feiloaiga.
Ua faailoa i auala o fesootaiga a le Matagaluega o le taua o le aoaoina lelei o malu o le malo, ona o se tautua e le gata e autu i le faamalosia o le tulafono ae o se auaunaga foi e ao ona matua malamalama lelei i le tulafono ma lona faatinoga.
O upu o le saunoaga a le Komesina mo le vasega fou o leoleo sa faamanatu iai le tāua o le filiga ma finau e sailiili ma suesue ao feagai ma aoaoga amata lea e 17 vaiaso o le a aooga ai.
O le nofoaga o aoaoga i Tafaigata ua avea ma se tasi o punāvai o le atamai e aoaoina ai alo ma fanau o Samoa ua fia ofo o latou ola ma soifua e tautua ai mo Samoa e ala i le galuega faaleoleo.
