I le tausaga e 2019 na amata ai ona toe sua ma faaleleia atili le aualatele mai le nuu o Saina i Faleata e oo atu i Faleolo i le malaevaalele faavaomalo, o lea ua mae’a nei lea galuega sa faatupe e le faletupe o le lalolagi ma paaga a le Malo o Samoa, i le tau atoa e selau sefululima miliona tala ($115 miliona).
E 24 kilomita le umi o le aualatele ma o se galuega na amata faatino i le taimi o le faigamalo sa iai, ma faaauau i le faigamalo ua iai nei i le faamoemoe autū ia faaleleia auala o feoa’iga mo le atunuu atoa.
O le Aso Faraile na te’a nei na umusa ma tatala aloa’ia ai lea galuega tele ua mae’a, ma ua fetaui ma le taimi ua lalata atu i le fono a Malo o le Taupulega.
Faaalia e le Minisita o Fela’ua’iga ma Galuega Tetele a le Malo, le tofa Olo Afoa Fiti Vaai i le umusaina o lea galuega, o se pine faamau lea o le siitia o le tamaoaiga o Samoa o se faailoga o galuega faaauau a le Malo mo le siitia o le soifua lelei ma le tamaoaiga o ona tagata.
Na ia faaalia foi o ananafi na fausia ai nei, o nei e fausia ai taeao, ae o taeao o le lumanai lea o alo ma fanau a Samoa.
I le vaevaeina o le tau e selau sefululima miliona na toe fausia atoa ai lea auala autū o feoa’iga a le atunuu, e 101 miliona 3 selau afe na faaalu i konekarate na feagai ma le galuega, 13 miliona selau afe tala na faaalu i le tusia o ata ma le mata’itūina o le faagasologa o le galuega, ae ‘afa miliona pe lima selau afe tala na totogi ai le taui o fanua ma meatotino a aiga na aafia i le galuega.
