O le Koluse Mūmū o se faalapotopotoga e ofoina fesoasoani i taimi o mafatiaga o tagata mai mala faalenatura, faapea ni puapuaga e aafia ai le soifua saogalemu o tagata ma ua 74 nei tausaga talu ona faavaeina lea faalapotopotoga i Samoa talu mai le tausaga e 1952.
O lenei vaiaso ua manatua ai e le Koluse Mūmū a Samoa nisi o ta’ita’i sa āsaina mai le gasū o le taeao i lana auaunaga, aemaise o nisi o tamalii o le atunuu na amatamea i le ta’ita’iina o le faalapotopotoga ina ua aloa’ia le faalapotopotoga o le Koluse Mūmū a Samoa i se tulafono na pasia i le tausaga e 1993.
O se tasi o tamalii na ulua’i avea ma Pelesetene o le faalapotopotoga ina ua tuto’atasi mai le ta’ita’iga a le Koluse Mūmū a Niu Sila o le tofa Faleao Maka Sapolu.
O se tamalii sa tele tausaga o ia ta’ita’iina le Koluse Mūmū ma o afā tetele o Ofa ma Valelia o nisi na o mala faalenatura na pito tele ai le sao o le faalapotopotoga i fesoasoani na tuuina atu i le atunuu.
Sa faaauau ia fesoasoani e isi ta’ita’i o le faalapotopotoga o loo iai i le taimi nei mo nisi o faalavelave faalenatura sa aafia ai le atunuu e pei o le sunami i le tausaga e 2009.
O le vaiaso nei i le faamanatuina e le Koluse Mūmū o le aso faavaomalo o le faalapotopotoga i le lalolagi ua faatino ai ma se tasi o ana auaunaga fesoasoani o le tuiina o toto mai le lautele o le aunuu e fia ofo o latou toto mo gasegase i le auaunaga a le matāgaluega o le soifua mālōlōina.
O loo mana’omia e lea matāgaluega le fesoasoani ona ua faaitiitia paina toto e faaleoleo mo gasegase tigāina aemaise o nisi e aafia le soifua i ni faalavelave.
