Ua sau ai le lapataiga a le alii faasalalau a le 1News i lana Breakfast Show, o Daniel Faitaua, ia faaeteete i le soona talitonu i le tele tala ma faasalalauga taufaasese ma le taufaavalea o loo feavea’i solo e tagata i luga o auala o fesootaiga faavavave i ona po nei, le social media.
Na faailoa mai e Faitaua le afaina o lagona aiga aemaise si ona tina o loo taputapua’i mai Kalaiesetete, ona ua oo le tala i le loomatua e faapea na loka e leoleo si ana tama i sana soligatulafono na fai.
O lena tala sa faailoa i luga o le itulau a le RNZ e faapea na loka e leoleo le alii faasalalau ma toe su’e totonu o lana taavale ma e iai ni mea na maua ai.
Na faamautinoa e Faitaua i si ona tuaa, e lē moni tala na feavea’i, ma e lē tatau ona faalogo i tala a fafine o le latou aulotu lea e foliga na maua ane ai e si ona tina le tala, ae faalogo tasi mai ia te ia e alu atu ai le tala sa’o.
O le fautuaga a Faitaua mo soo se tasi na faalogologo i le latou polokalame i lea aso, faamolemole, aua le apoina le tele o le mau lipoti ma tala o loo faasalalau i luga o le facebook ma isi auala o fesoota’iga televavave faaonaponei, auā e lē o tala uma o loo e faitau iai e moni.
Puna o Faamatalaga: https://www.1news.co.nz/2024/06/25/an-absolute-scam-daniel-faitaua-warns-of-fake-arrest-post
