Ua faamanino mai nei e le ta’ita’i o le Itu Agai a le malo, le vaega faaupufai a le Leipa, lo latou lagolagoina o le feagaiga o fefaataua’iga i le va o Niu Sila ma le malo tele o Initia.
O lenei feagaiga o le a vaaia ai le faatino o fefaataua’iga o oloa i le va o atunuu e lua i lalo o aiaiga ua latou ioeina.
O le lagolagoina ai e le vaega faaupufai a le Leipa o lenei feagaiga o le a mautinoa ai le pasiaina i totonu o le Palemene, e aofia ai ma le lagolago a le National ma le ACT.
Ta’ua e le ta’ita’i o le Leipa, Chris Hipkins o le a lē taofia e le vaega faaupufai le feagaiga, ae na faaalia e Hipkins, e pau le tulaga e tatau ona tilotilo toto’a ma o se popolega, o le ta’utino ai e le malo le oo atu lea i le $20 piliona tālā Amerika le tauaofa’i o pisinisi tuma’oti teufaafaigaluega a Niu Sila o le iai i totonu o Initia mo le isi 15 tausaga.
Faaalia e Hipkins o se fuafuaga ua ia ta’ua e matua’i lē fetaui ma o ni fuafuaga ua ia fautuaina ai tagata faipisinisi e avatu a latou oloa i atunuu i fafo, ina ia taga’i lelei i aiaiga o ni itu e ono oo ai i se tulaga ma’ale’ale mo i latou.
Ma o se fuafuaga e mautinoa latou te lē lagolagoina i taimi o felafolafoa’iga.
O le a malaga atu ai le Minisita o Fefaataua’iga o Todd McClay i New Delhi Initia e saini aloa’ia lenei feagaiga i le Aso Gafua o le vaiaso a sau nei, e ui ua faamanino foi e sui o le vaega a le New Zealand First lo latou teena o lenei fuafuaga.
Puna o Faamatalaga: https://www.rnz.co.nz/news/political/593185/chris-hipkins-announces-labour-will-back-india-free-trade-deal
