E 16 ‘au a alii mai kalapu lakapi i le atunuu o le a latou sailia le siamupini o le taamilosaga lakapi ta’itoafitu a le afioaga o Sapapalii i Savaii, lea ua avea le kamupani o le Federal Pacific ma lagolago autū, ma le lagolago a faletupe o le Samoa Commercial Bank ma le faletupe o le Pasefika i Saute le Bank of the South Pacific.

Ua faailoa e le faatonu o le taamilosaga le susuga Papalii John Taimalelagi Afele, o le tausaga nei ua siitia le faailoga tupe o le ‘au e siamupini mai le 6 afe tala sa iai i le tausaga na te’a nei, i le sefulu afe tala i le tausaga nei.

Ua saunia foi ni faailoga tupe mo isi ‘au o le a maua le tulaga lua, ma le tolu faaopoopo iai ma faailoga faapitoa poo consolation prizes.

E 30 afe tala le lagolago autū a le Federal Pacific mo le taamilosaga lenei e pei ona sosoo ai nei tausaga o tumau pea le avea o lea kamupani ma lagolago autū poo le major sponsor.

O le Aso Faraile ma le Aso Toonai o le vaiaso asau o le a faagasolo ai le taamilosaga lakapi ta’itoafitu o le Mataniufeagaimaleata Sapapalii sevens.