O le taimi ua lata i le ‘afa o le valu i le po o le Aso Lua i Samoa na toe nanati atu ai le pulega ma se vaega o le aufaigaluega a le malosi tau eletise e sa’ili le mafua’aga o le pe faafuase’i o le uila ma toe aafia uma ai le motu o Upolu.
O le te’a o le 10 i le po lava o le Aso Lua na mau ai le faamatalaga mai le faalapotopotoga o le malosi’aga tau eletise o se isi foi faaletonu i uaea eletise i lalo o le palapala le mafua’aga o le faaletonu.
Ua faalua ai nei ona tupu lea faaletonu ma pe atoa ai Upolu ma ua iai ma le fesili pe aisea ua lē mafai ai ona togafiti i se pe e tasi aemaise o Upolu atoa ua aafia.
O masini e alu i le eletise a nisi aiga ua faaletonu ai.
O le Aso Sa na te’a nei o le 10 i le taeao na motusia faafuase’i ai le uila ae faato’ā maua lea auaunaga i le afiafi faasolo i le pogisa.
