O le faai’uga o lena vaiaso na taunuu manuia ai i Peletania le aulakapi liki a le atunuu, le Toa Samoa ma ua sauni ai mo ana taaloga e lua, lea o le a toe feiloa’i ai ma le ‘au malosi a Egelani na faia’ina i le Toa Samoa i le Ipu o le Lalolagi i le tausaga e 2021.

O le Aso Sa o muamua nei le aso 27 o Oketopa lea taaloga ona faai’u lea i le taalosaga i le aso 2 o le masina fou o Novema.

I taumafaiga a le aulakapi liki a tamaita’i le Fetu Samoa, o le manumalo ai o le ‘au a tamaita’i i le Aso Toonai na te’a nei i le taaloga ma tamaita’i Tonga i le taamilosaga sa’ili avanoa mo le Ipu o le Lalolagi i le tausaga e 2026, ua faatali ai nei mo lana taaloga e tasi o loo totoe e iloa ai le sao atu i le Ipu o le Lalolagi.

O le taaloga a aulakapi liki a tamaita’i Fiti ma le Atu Kuki i le vaiaso nei, o le a iloa ai se ‘au e taaalo ma le Fetu Samoa.

O lona uiga o le a faatalitali poo ai o Fiti ma le Atu Kuki e manumalo. 

I le aulakapi iuni o le ‘au a tamaita’i le Manusina ma ana taaloga ua mae’a nei sa sa’ili ai sona avanoa i le Ipu o le lalolagi i le vaega o tamaita’i e faia i Egelani i le tausaga fou, o lea ua faamautū le sao atu o le Manusina i le Ipu o le Lalolagi mo le taimi muamua, talu mai le tausaga e 2014.

O se tasi lea o matati’a ua faaalia i se lipoti ua ausia e tamaita’i Samoa i le taaloga o le lakapi a o finau mai e sa’ili sona avanoa i le Ipu o le Lalolagi.

O le taaloga i Dubai a le Manusina ma le ‘au a Madacasgar na manumalo ai i ‘ai e 46 i le 15 ma faamautū ai lona avanoa i le Ipu o le Lalolagi.