Ua oo atu tapenaga o le malaga mai i le atunuu o le Toa Samoa i le faia e le lakapi Liki a le atunuu o se sailiga seleni e ala i se TV ma se Leitiofoni ua faamoemoe e faia i le Aso Toonai le faaiuga o le vaiaso nei, o le a tatala ai le avanoa i pisinisi ma tagata lautele e fia lagolago i le tali faaaloalo e faafetaia ai le alofaiva o le aulakapi Liki o le Toa Samoa na taunuu lana finau i le Ipu o le lalolagi i le sailiga o le siamupini.
O le feiloaiga a le pulega o le laka liki a Samoa ma kamupani o loo lagolagoina lenei faamoemoe, na faailoa ai e le Peresetene le afioga Tagaloa Faafouina Su’a, e telē le fesoasoani a le malo ua faailoa atu mo le faamoemoe, peitai e le o mafai ona faailoa lautele e le peresetene lea tulaga.
O le tautua a le faletelevise o le TV1 ma le leitio o le MY FM o le a faasalalau ai le suegatupe mo le Toa Samoa, ae ua faaalia e le Peresetene e ui o Samoa o loo autu iai le faamoemoe ae e le vaoia le atunuu o alala i fafo pe a fia fesoasoani.
Le pelesetene o le LakapiLiki Samoa afioga Tagaloa Faafouina Su’a.
